Tunog Kalye

Date: November 23, 2021 - Tuesday

Ang bawat isa sa atin ay may Halaga. Anuman ang estado natin sa buhay, mayroon tayong kanya kanyang gampanin para sa ating pamilya at sa ating pamayanan.

Ako si "Buloy" , isang tambay at palaging nakatanaw sa kawalan. Nag-iisip kung papaanong iaahon ang sarili sa kinatatayuan. Walang maayus trabaho ang sa akin ay gustong tumanggap, sapagkat di nakapagtapos bunsod ng kahirapan.

Beer ang aking katuwang sa oras ng kalungkutan. Hangad na makalimot kahit na panandalian. Pagsapit ng hapon, sa kanto ay tatambay. Upang malibang ang sarili at sa iba din ay makibagay.

Ang mga tao sa aking paligid ay namulat sa kanilang Maling Akala. Na ako ay walang silbi sa pamayanang kinabibilangan. Sa akin ay walang pumapansin, kaya sa isang sulok ay nagmumokmok mandin.

Elesing papel, aking sinubukang binuo. Iniabot sa mga batang abalang nangangalakal. Mga batang tanging sa akin ay nag-abalang makihalubilo. Mangha mangha sa aking obrang resiklo.

Image address

Ligaya ang hatid ng munting laruan, sa mga batang walang pambili ng magarang laruan. Sa simpleng gawang kamay at resiklong kapiraso, binuo ng mga kamay na sa iba'y walang silbi kuno.

Minsan may napadaan sa aking lugar ng tambayan. Isang binatilyo wari ba ay balisa. Nang aking tanungin "Boss ano ang iyong problema?" Binatilyo ay sumagot "Umiibig ako sa isang kolehiyala".

At ako ay sumagot, "kung ang intensyon mo ay tapat, bakit di ka magtapat?". Huwag kang Matakot na sumubok, dahil ako'y naniniwalang kung hindi ukol sadyang hindi bubukol.

Bakit hindi ka sumubok na sya ay awitan ng Harana? O kung hindi naman kaya, ay iyong alayan ng Nobela. Kung iyong mamarapatin, ano ba ang pangalan nya?

"Jopay" wika ng binata. Sya'y aking sinisinta mula pa nang unang makita. Labis ang kabang aking nadarama, sa tuwing sya ay aking nakikita.

Handa akong gawin ang lahat para sa kanya, ani pa niya. Kahit ang pagYakap sa Dilim, aking gagawin upang sa kanya's maipadama. Na ako'y nandito lang, sumusubaybay sa kilos nya.

Hanggang Kailan ka magtatago ng iyong nararamdaman? Bakit hindi mo sya tapatin at nang iyong malaman? Kung anong kanyang isasagot sa iyong katanungan.

At kung hindi mo man makamtan, kasagutang inaasam. Huwag mag-atubiling ipagTuloy pa rin anuman ang iyong nasimulan. Sapagkat ang pag-ibig, hindi minamadali iyan. Hayaan mong ang tadhana ang syang magbadya. Kung ikaw ba at sya ay talagang para sa isa't isa.

Kisapmata lamang ang lahat dito sa daigdig. Sa isang iglap maaring magbago ang iyong paligid. Kaya huwag nang sayangin ang panahon. Magtapat na kung may pagkakataon.

With a smile you can do it!. Alam kong iyan ay kaya mo!. Kung kailangan mo ng sidekick ay nandito lang ako. Isang tambay at ang sabi ng iba'y walang magandang kinabukasan.

214 yan ang petsa ngayon. Pebrero katorse araw ng mga puso. Mag aalangan ka pa din ba, baka maunahan na ng iba. Humayo ka at ayain nang sya ay magsimba. Maya-maya pa ay tumalima na ang binata. Bitbit ang gitara, ang isang tangkay ng rosas at tatlong tsokolate ay pasimpleng ibinulsa.

Ngayo'y nag-iisip, nakatitig sa kawalan. Bigla kong naalala ang matagal ko nang inaasam. Overdrive, kung pwede lang. Magdrive nang magdrive hanggang sa buwan. Puntahan ang mga lugar na natatanaw ng aking balintataw.

Humiga nang bahagya at tumingin sa Alapaap. Bahagyang napaisip, ginagawa ko't hindi tama. Hindi dapat magpakalugmok at tumambay sa isang sulok. Katulad ng binata, kailangan ko na ding kumilos.

Kahit na nga ako ay isang Hari ng Sablay. Sa hamon ng buhay, kailangan kong matutong makisabay. Tama sila, sa akin nga ay walang mangyayari. Kung ako'y uupo na lamang at mag aabang ng trabaho sa isang tabi.

Gumagawa ako ng code ko kanina habang nakikinig sa OPM songs. Mahilig akong makinig sa mga kanta ng mga bandang Pinoy katulad ng Parokya ni Edgar, Rivermaya, Eraser Heads at iba pa. Gusto ko din sina Gloc 9 at Abra.

Anyways, salamat po ng marami sa inyong pagtatyaga. Wala talaga akong maisip ngayon dahil nautas na ang utak ko sa pagco-code kahapon pa. Gayunpaman, maraming maraming salamat talaga sa inyo. Kayo ang isa sa dahilan kaya kahit abala ay pinipilit ko pa din makabuo ng mga ganito :)...