@remofm 31 August 2021

Paano Maging Mamamahayag sa Pilipinas? Kwento Ng Isang News Producer

Bilang pagdiriwang sa huling araw ng **Buwan ng Wikang Pambansa** ngayong Agosto, naglathala ako ng kauna-unahan kong Tagalog na artikulo. Laman nito ang aking kwento bilang isang mamamahayag o *journalist s*a Pilipinas. **Paano Ba Ako Naging Mamamahayag?**

Isa akong *Senior News Producer* sa isa sa pinakapinagkakatiwalaang himpilan sa pagbabalita sa bansa. Pero hindi naging madali ang aking pagpasok sa industriya. Nagsimula ako bilang isang *intern* sa kumpanya noong 2014. Pagka-*graduate* ko bilang *Magna cum Laude* sa isang malaking unbersidad sa Maynila noong ding taong iyon, nag-*apply* ako at nakapasok bilang *production assistant* o PA sa parehong kumpanya*.* Bilang PA, naging taga-*print*, taga-*photocopy*, taga-takbo ng *scripts*, taga-bili ng pagkain ng *anchor* at utusan ako sa opisina noon. Halos nabalewala ang mga pinag-aralan at *award* ko. Tumagal ako sa trabaho nang walong buwan. Binago ko ang lahat. Nagpakitang-gilas ako na hindi lang ako mananatiling PA at kaya kong magsulat ng balita.

Sumubok ako maging *news writer* sa parehong kumpanya*.* Pinag-*exam* ako. Ilang linggo rin ang hinintay bago lumabas ang resulta na nakapasa ako. Isinabak ako sa mga programa ng Sabado at Linggo. *English* ang lenggwahe namin sa pagbabalita. Hanggang sa unti-unti nang napansin ang galing ko. Na­-promote ako bilang *Junior News Producer* at kalauna’y *Senior News Producer.* Sa ngayon, pitong taon na ako sa parehong kumpanya. Sa tinagal-tagal ko, matatag na ang tiwala sa akin ng mga *boss, news anchor, reporter, desk editor,* at iba kong kasamahan sa opisina. **Ano Ba Ang Trabaho Ko?**

Bilang *Senior News Producer*, trabaho kong magsulat ng balita. Responsibilidad ko at mga kapwa ko mamamahayag na ipaalam sa sambayanang Pilipino ang totoong kalagayan ng ating bansa lalo na ngayong pandemya, tuwing may bagyo, tuwing nag-aalboroto ang bulkan, at higit sa lahat, sa halalan. Iba’t ibang balita ang isinusulat ko. May tungkol sa pulitika, kalusugan, at krimen. Kung minsa’y tungkol sa *showbiz* at *trending* na usapin sa social media. Ayoko lang magsulat ng tungkol sa *sports* at *business* dahil hindi ako pamilyar. Sa *crypto,* pwede pa! Nagsusulat din ako ng mga tanong para sa *interview* ng mga iba’t ibang opisyal, politiko, at mga personalidad na kinakapanayam namin sa aming mga programa. **Puro Sulat Lang Ba?**

Pagsusulat na may kasamang *research* at *fact-checking* ang pangunahin kong responsibilidad, pero bukod diyan, marami pa akong tinututukan sa trabaho. Nariyan ang pagbuo ng tinatawag naming *story line-up* o *rundown.* Ito ang tahi ng bawat balitang ipinapalabas sa TV. Sinisimulan ang rundown sa *top stories* o ‘yung pinakamaiinit na balita ngayong araw. Depende ito kung ano ang pinakabago o ‘di kaya’y *breaking news.* Maaaring tungkol ito sa Pangulo, pagdinig ng Senado o Kamara, krimen, pandemya, bagyo at iba pa. Isinasama rin ang mga balita sa mga probinsya gayundin sa iba’t ibang panig ng mundo.

Karaniwang tinatapos ang isang *news program* sa isang masayang balita gaya ng *showbiz* o *trending* sa *social media.* Itinatahi ‘yan lahat ng isang *producer* para makabuo ng programa na pasok sa ibinigay na *air time* ng istasyon. Karaniwang tumatagal ang mga programa ng 30 minuto hanggang isa’t kalahating oras. Nariyan din ang pangunguna ko sa pag-eere ng mga programa.

Dalawang programa ang hawak ko, isang *newscast* at isang *public service* *program.* Parehong Tagalog ang lenggwaheng gamit namin sa pagbabalita. Kaya kung maikukumpara ninyo sa mga nakalipas kong *article,* mas matatas akong magsulat sa Tagalog kaysa sa *English.* Bilang *Senior News Producer,* pinamumunuan ko ang isang *team* ng *production staff* sa loob ng tinatawag na *control room (makikita ang halimbawa ng isang control room sa larawan sa taas).* Kung nanonood kayo ng balita, ang nakikita lang ninyo sa telebisyon ay ang *news anchors* na nagbabasa. Pero sa likod ng *camera*, may mga *news producer* at iba pang miyembro ng produksiyon na nagpapatakbo sa programa. Tuwing umeere, galing sa *producer* ang *command* sa loob ng *control room.* Kami ang nagdedesisyon kung ano ang ipapalabas sa telebisyon at kung ano ang babasahin ng tagapagbalita. Kami rin ang kumakausap sa *news anchor* habang umeere. Kung mapapansin ninyo, minsa’y may pinipindot sa tenga ang mga *news anchor.* Ibig sabihin nito, kausap namin sila mula sa *control room*. **Paano Tumatakbo Ang Araw Ng Isang Mamamahayag?**

Sinisimulan at tinatapos ko ang aking araw ng nagbabasa ng balita. Sa opisina namin, mayroon kaming *group chat* kung saan ipinapadala ang lahat ng balitang nakalap. Binabasa ko ito isa-isa para makapag-desisyon ako kung ano ang dapat isama sa *story line-up* o rundown. Bukod sa *group chat*, naka-*monitor* din ako sa social media kung saan sunod-sunod ding lumalabas ang mga balita. Bukas din ang mga mata ko at tenga sa paligid para malaman ang hinaing ng simpleng mamamayan na pwedeng maging basehan ng isasama namin sa programa. **Paano Binago Ng Pandemya Ang Trabaho?**

Malaki ang naging *adjustment* ko dahil sa pandemya. Karamihan sa mga kasama ko sa programa, naka-*work-from-home* na ngayon para maiwasan ang siksikan sa opisina. Sa anim na kasama ko, ako na lang ang naiwan sa *control room*. Naging mahirap ito sa simula dahil kausap ko lang sila sa telepono o *Zoom* halos buong *shift* namin sa opisina. Hindi katulad dati, katabi ko lang sila tuwing may pagdedesisyunan kami para sa programa. **Panghuli, Mga Aral Na Natutunan Bilang Mamamahayag** Hindi madaling makapasok sa industriya ng pagbabalita kaya hindi ito dapat sinasayang. Naging mahirap man ang pinagdaanan ko, nagbunga naman ito ng tagumpay ngayon. Sa determisyon at kagustuhang matuto, magiging magaling tayo sa pinili nating propesyon. May mga hamong dadating pero malalagpasan din natin. Gusto mo bang malaman ang iba pang kwento ng isang news producer? Mag-iwan lang ng comment sa baba. #journalist #storytime #news #pandemic