Ako ay tunay na natutuwa dahil sa rekognasyon na ibinibigay ng magiting na tagapag bigay dito sa platform na ito (The Random Rewarder) sa ating wikang Tagalog. Napapansin kong madami na ding nag lalathala ng mga artikulo dito gamit ang wikang Pilipino na nakakatanggap ng lagay mula sa ating tagapagbigay.
Para sa akin na mababa at hindi gaanong malaki ang kaalaman sa wikang ingles at kailangan pang gumamit ng mga aplikasyon na nag sasalin ng wikang Pilipino sa wikang ingles, ito ay tunay na nakapag bibigay sa akin ng kasiyahan ay tunay naman talaga. Alam kong marami dito ang tulad kong hindi naman kagalingan sa wikang ingles kaya kapareho nila ang aking nararamdaman.
Ang wikang ingles ay pangkalahatang lenggwahe. Marami kang makakatalakayan sa paggamit ng wikang ingles kaya mas marami ang mas gusto itong gamitin. Alam ko dahil kahit ako ay wikang ingles din ang ginagamit kapag naglalathala ng mg artikulo, kung ikaw ay isa sa aking tagapag basa ay alam kong alam mo ito. At kung bibisitahin mo naman ang aking inilathalang artikulo ay iyong makikita na lahat ito ay nakasulat sa salitang ingles.
Sa isipan ko ay nararapat lamang na ingles ang wika na gamitin kung gusto kong makipag komunikasyon sa iba, komunikasyaon ang isa sa pinaka mahalagang uri ng pakikipag talakayan. Makapagbibigay ang mambabasa ng kanilang opinyon, kuro-kuro o puna sa iyong gawang artikulo. Kaya kahit na ako'y madalang na nakakatanggap ng lagay sa bagong imbensyon na robot ay hindi ako nagrereklamo, dahil alam kong ang aking gawa o sulat ay hindi gaanong maganda, hindi maayos ang pagkakasulat, hindi naipaliwanag ng maayos dahil medyo salat sa kaalaman sa temang isinulat, pero kung mababasa mo sa grupong aking kinabibilangan sa facebook ay iyong makikitang napupuno din ang salop, nagrereklamo din ako pero doon lang sa grupo na iyon.
Minsan pa'y nakakaramdam din ako ng kawalang gana na magsulat dahil na rin minsan ay hindi ito nakakatanggap ng rekognasyon sa tao man o sa robot. Pero pag ang akin namang gawa ay nakatanggap ng lagay o ng rekognasyon mula sa aking taga suporta katulad na lamang ng mga Binibining marikit na ito, Jane, Eybyoung, Tired_momma, Yen at Esciisc. Kung iyo lamang makikita ang aking notipikasyon na nakapaloob sa "Upvote" ay makikita mong puro pangalan nila ang nakalagay doon. Ang aking saya ay walang pagsidlan, sa emosyon na akong nararamdaman pag ako'y nakakatanggap sa kanila ng rekognasyon. Hindi lamang dahil sa lagay na kanilang bigay kundi dahil alam kong kanilang nagustuhan ang aking gawa, kahit pa nga ba medyo hindi maayos ang aking pagkakagawa at pagkakasulat. Kaya mula sa aking puso, ipinapaabot ko sa inyo ang aking taos pusong pasasalamat para sa walang sawang pag suporta sa aking gawa, hindi sapat ang isang Salamat para maipabatid sa inyo ang aking nararamdaman, ay tunay ga namang. Kaya isang milyong salamat sa inyo, nawa'y makahanap na yong iba diyan ng iibigin, wala akong ibang nais ipakahulugan dito, ang gusto ko lang ay masaya kayo. Kung ang edad mo naman ay nasa kalendaryo pa ay wala kang dapat ikabahala, mahaba haba pa ang oras mo. Pero pag ang edad mo ay tumuntong na sa Bente Nuwebe, ay doon tayo kabahan, hane.
Muli, ako po ang inyong munting lingkod, Ruffa ang aking pangalan, anak ako ng aking Ina at Ama, Pamangkin ako ng aking Tiya at Tiyo at Kapatid ko ang aking Ate at Kuya. Bumabati ng isang Mapagpalang Umaga para sa lahat, at sana po ay ako'y muli ninyong iboto para sa darating na halalan at makasisiguro kayong gamot ay laging bago. Naisingit ko laang ari gawa ng baka ikaw ay may suliraning kinakaharap ngayon at baka sakaling ikaw ay aking mapangiti, sana ay napangiti kita kahit na nga ba Korni ang banat ko. "Kung ikaw ang masaya tumawa ka, Ha! Ha!" Kalimutan muna saglit ang iyong mga iniindang sakit, magsaya ka muna kahit saglit. Mabuhay tayo mga kapatid, mabuhay ang wikang Pilipino.
Hindi pa pala tapos ang aking talumpati, kung inyong mamarapatin nais ko sanang dugtungan pa ito, kaya kung ikaw ay nahahabaan na sana ay ituloy mo pa din ang pagbabasa mo. Kung ano ano na ang pinagsusulat ko pero yong nais kong ipabatid sa lahat ay nakaligtaan ko na, dumaldal ako ng dumaldal kaya pasensya na.
Ang nais ko talagang sabihin sa lahat ay, hindi masamang mag sulat o mag salita gamit ang ibang wika. Lalo na ang wikang Ingles, sa kadahilanan nga na ito ay magagamit natin sa pakikipag huntahan sa taga ibang dimensyon, planeta at bansa. Pero sana naman ay wag mong kakalimutan na Pilipino ka at meron din tayong Tagalog na wika. Na kahit saan ka magpunta, wag mong iwala ang kaalaman mo sa ating sariling salita dahil bukod sa itsura mo, sa tradisyon mo at paniniwala mo, sariling wika mo lamang ang tanging pagkakakilanlan mo. Sariling wika mo lamang ang magpapatunay na isa kang Pilipino, at ang ang wikang Pilipino ang kinamulatan mo.
Sari sari na ang mga salitang nag susulpotan sa ngayon, nag umpisa sa jejemon, sa mga lenggwahe na hindi mo mabatid kung ito baga ay salitang elyen o ano. Bigla na lamang naglitawan at nauso na ding gamitin ng mga tao. Ay alam mo pa baga ang ibig sabihin ng "Naapuhap" o kaya ng "Agam-agam," ay ang "Dinaluhong" kaya? Ay malamang ay alam nyo yan, Pilipino ka, kaya dapat alam mo.
Umaamin naman ako na iilan nalang din ang alam kong mga salita na malalalim, pero hindi ko nalilimutan na may salitang ganito, yong kung hindi mo sisisidin ay di mo malalaman ang kahulugan. Gugugol ka ng oras para maalaman ulit ang mga salitang malalalim na ito. Bilang pagsuporta na rin sa sariling wika mo, subukan mong gumawa ng pagsasaliksik hinggil sa sariling wika mo, hindi ako nagpapasaring sa kahit na sino pa man. Wala naman akong pinaglalaban, gusto ko lang bagang humaba ang usapan. At diyan na talaga nagtatapos ang aking artikulo, siyasatin mong maigi ang mga salitang ginamit ko na hindi pamilyar sa iyo, tapos egoogle mo.
Ipagyabang ang sariling wika, mahalin at igalang wag sanang ikakahiya. Pilipino tayo hindi lamang sa gawa, maging sa ating pananalita dapat alam mo yan darling.
Ang mga nakapaloob dito ay purong Gawa ng may Akda, isinulat galing sa puso at pinaka sulok sulokang bahagi ng isip nya, pinakasulok sulokan dahil ang nasa unahang bahagi ay puro pangalang hindi mahinuha, basta puro "Lee" ang simula.
English Version from Google Translate
Wahaha kaaliw lng.