Pag-uulayaw Sa Asotea

Tanda mo pa ba? Ang kwento nina Maria Clara at Crisostomo Ibarra? Ang mga bidang likha ng ating pambansang bayani sa Huwag Mo Akong Salingin, o Noli Me Tangere sa nakararami.

Balikan natin ang ilang mga sandali ng dalawang bida na sa huli'y naging sawi rin. Ikapitong kabanata, Ang Pag-uulayaw Sa Asotea, dito pinakita kahit sandali lamang ang pagiging magkatipan ng dalawa. Kahit sandali lamang, silang dalawa ay nabigyan ng pagkakataon para makapagsarili. Saglit na sinariwa ang mga lumipas na sandali. Mga alaalang kay tamis na nagbigay ngiti sa kanilang mga labi. Ang pinagmulan ng kanilang pagmamahalan, tawanan at tampuhan. At nagtapos nga ang kabanata sa pagtulos ng dalawang kandila ni Maria sa mga Patron ng Manlalakbay.

Kung di mo pa batid ang ibig sabihin ng salitang 'pag-uulayaw' ay halika at lumapit sa akin at nang maibulong ko sa'yo giliw. Suyuan, lambingan o pwede rin namang landian. Para sa magkasintahan o kahit na mag-asawa basta may dalawang pusong wagas na nagmamahalan.

Ganyan sila noon. Ganyan sila magpahayag ng nararamdaman para sa kanilang sinta. May paggalang sa babae, may respeto sa pamilya ng babae at sa kanya mismo. May pagtalima sa mga pangakong binitiwan. Ganyan pa rin ba tayo ngayon? Sa makabagong panahon, buhay pa ba ang lahi ni Crisostomo Ibarra? Mayroon pa rin bang kamag-anak si Maria Clara? Ikaw? Paano mo pinapakita ang pagmamahal mo sa iyong sinisinta? Paano mo pinahahalagahan ang mga pangakong inyong binitiwan sa isa't isa? Paano nga ba magmahal ang mga Maria Clara at Crisostomo Ibarra ng makabagong panahon?

Ikaw, Ibarra ng makabagong panahon, naranasan mo bang magsibak ng kahoy, mag-igib ng tubig o kahit magluto para suyuin ang iyong minamahal? O nagpa-Grab Food ka na lang o kaya ay Food Panda para kayong lahat ay makakain na? Nagbigay ka na ba ng isang bungkos ng rosas? O ikaw mismo ang nakatanggap? Mukhang may kasama pa nga na tsokolate at maliit na laruang oso. At kung medyo nakaluluwag-luwag ay may kasamang ding pera.

Uso pa ba ang harana? Tanong yan ni Chito Miranda. Mayroon pa nga bang gumagawa nito ngayon? Sinong lalaki ang hanggang ngayon ay kinakantahan ang kanilang kasintahan upang iparamdam ang kanyang pagmamahal? Mayroon na bang babae ang gumawa na nito? Isa ding paraan upang mapagkasundong muli ang mga pusong nagkatampuhan.

Paano naman ang mga liham, tula o sanaysay na handog para sa iyong minamahal. Naranasan mo na ba gumawa, o ikaw ang ginawan? Mayroon nga kanta ang ginawa, laman ang paghanga sa taong minamahal.

Hatid-sundo mo rin ba mula sa bahay hanggang eskwelahan o opisina ay iyong dilag? O may lihim kayong tagpuan sa malapit sa punong mangga? Kasabay sa paglalakad sa tuwing may pagkakataon. Inaalalayan para hindi madisgrasya at hindi mahulog sa iba.

Patalastas! Huwag mong kalimutang bisitahin din sila.

Nagbago man ang panahon, ang mga tao maging ang ating paligid, ngunit may ilang bagay ang nananatili. Magkaiba man ang kinalakihang henerasyon, pagdating sa pag-ibig ang lahat ay nagkakaisa.

Ang Sa Akin Lang

Napakalaki na ng pinagkaiba ng henerasyon noon kumpara sa henerasyon ngayon. Mayroong mga nagsasabi na mas mainam pa ang dati kumpara sa kasalukuyan dahil sa maraming bagay. Ang sa akin lang, parte ng paglaki ng tao at mundo ang pagbabago. Totoong napakalayo na nga nang ating narating. Mula sa teknolohiya, sa mga paniniwala, sa pamumuno at marami pang iba. Ang lahat ay may kakabit na kabutihan at kasamaan. Pero ang lahat ay isa lang ang pinagmulan, pagmamahal sa sarili, para sa kapwa, para sa bayan, para sa May Likha.

-WAKAS-

Orihinal na likha ng malikot na pag-iisip ng inyong likod.

If you wanna know some of my daily activities, short posts or want to have some good vibes, you can visit my Noise account MrsPepper.