"Pamahiin"

Kung isa ka din katulad ko na lumaki sa probinsya, malamang katulad ko, marami ka ding mga pamahiin na kinalikhan tulad ng mga sumusunod:

Disclaimer: Ang mga sumusunod ay base sa aking kinalakhihang paniniwala. Hindi ko po sinasabi na ang mga pamahiing ito ay mga totoo o may basehan at hindi ko din po sinasabi na ang mga ito ay mali.

• BAWAL MAGWALIS SA GABI:

  

  

  Kung makalat ka kumain, o ang mga anak mo, pamihado madaming laglag na kanin sa ilalim ng hapag pagkatapos kumain.

  Pero, sa halip na walisin, kailangan mong damputin isa isa ang mga mumu (nalaglag na kanin) dahil naniniwala ang mga matatanda sa probinsya na para daw winawalis mo palayo o palabas ang grasya kapag nagwalis ka sa gabi.

• ITAGO SA LIBRO ANG UNANG GUPIT NA BUHOK NG BATA.

  

  

  Paniniwala ng matatanda na magiging matalino ang bata kapag ang unang gupit nyang buhok ay itinago o isiningit sa libro.

• PAGLUNDAG SA BAGONG TAON

  Aminin, kahit ikaw ginagawa mo ito. Naniniwala ang marami na pag lumundag ka ng tatlong beses sa pagsapit ng ika alas dose ng hatinggabi, ikaw ay tatangkad. Ginawa ko ito noon at hanggang ngayon, pinapagawa ko din sa mga anak ko sa tuwing sasapit ang bagong taon.

• BALIGTARIN ANG DAMIT PAG NALILIGAW

  Kung ikaw ay nasa kalagitnaan ng kasukalan at hindi mo na malaman kung saan ang daan pabalik, baligtarin mo daw lahat ng suot mo. Kasi indikasyon daw yun na pinaglalaruan ka ng engkanto.

• BAWAL MALIGO PAG MAY DALAW.

  Karamihan sa mga lola noon, sinasaway ang mga apo kapag nalalaman na may dalaw pero naliligo pa din. Papasukin daw kasi ng lamig ang matres.

• BAWAL MALIGO KAPAG BAGONG PANGANAK.

  Katulad din nang sa may buwanang dalaw, mahigpit ang mga matatanda sa aming probinsya noon pagdating sa pag aalaga sa bagong panganak. Kailangan muna maghintay ng 9 na araw bago payagang maligo ang bagong panganak upang maiwasan daw ang BINAT. Ang tubig na kanyang ipapaligo, dapat may halo pa nag pinagpakuluan ng pitong klase ng dahon. Ilan sa mga dahon na naalala ko ay dahon ng alagaw, dahon ng suha, dahon ng kalamansi (hindi ko na po maalala ang iba pa).

  Pero sa kaso ko, palibhasa nasa CITY na ako nung una akong manganak, mas sinunod ko ang advise ng OB-GYNE ko na maligo 1 day after ko manganak.

  Nagkakatatay din ng manok, o kung minsan ay baboy bilang pagdiriwang sa araw ng ligo.BUHOS ata kung tawagin ito sa iba.

• PAGLALAGAY NG LIBRO SA ILALIM NG UNAN.

  Hindi ko din alam kung bakit naniniwala ako dito pero ginawa ko po ito mula elementary hanggang mag high-school ako.

  Yung pointers for review na ginawa ko, o kung di naman kaya yung notebook ko, inilalagay ko sa ilalim ng aking unan. Ang paniniwala namin noon dito, para daw hindi mo makalimutan ang mga pinag-aralan mo.

• SA UNANG PAGDATING NG BUWANANG DALAW NG BABAE, KAILANGAN NYA TUMALON SA IKATLONG BAITANG NG HAGDAN.

  Bilin din ito sa akin ng lola ko noon. Na kapag dumating na ang aking buwanang dalaw, tumalon daw ako mula sa ikatlong baitang ng hagdan. Ito ay para hindi tumagal sa tatlong araw ang aking buwanang dalaw. Ginawa ko din anman at hindi ko alam kung dahil dito kaya hanggang tatlong araw lang din ang aking buwanang dalaw.

• BALIS O USOG

  

  

  Naniniwala ang karamihan sa lugar namin sa probinsya noon na kapag ikaw ay bigla nalang nakaramdam ng panlalamig at sakit ng tiyan, ibig sabihin may nakabati o nakausog sayo. Ganun din sa mga sanggol. Pagka malalim ang bunbunan ng sanggol at iyak ng iyak, pinaniniwalaan na sya ay nausog. At para matanggal ang balis o usog, kailangan syang pahiran ng laway sa tiyan, sa talampakan o kaya naman ay sa noo ng tanong nakabalis o nakausog.

• MAY PERANG PARATING KAPAG NANGATI ANG MGA PALAD.

  Kapag daw nangangati ang iyong palad, ibig sabihin daw nito, may darating na pera. Pero bawal mo itong kamutin dahil pag kinamot mo, hindi daw matutuloy ang pagdating ng pera.

• HUWAG NAGPPATAS NG MGA MGA PINAGKAINAN SA MESA KAPAG MERON PANG KUMAKAIN.

  Ayon sa kasabihan, kapag daw may kumakain pa at pinatas mo na ang mga pinagkainan sa hapag, hindi daw makakapag asawa yung naiwan na kumakain pa habang pinapatas na ang pinagkainan.

• MAY BISITANG DARATING KAPAG MAY NALAGLAG NA KUBYERTOS HABANG KUMAKAIN

  Kapag daw kutsara ang nalaglag, babae daw ang parating na bisita. Pero lalake daw kapag tinidor ang nalaglag.

• MAGLAGAY NG ISANG DOSENANG KLASE NG BILOG NA MGA PRUTAS SA LAMESA SA PAGSALUBONG NG BAGONG TAON.

  Ito, sigurado na hanggang ngayon halos lahat ng Pilipino ay naniniwala na magiging masagana ang buong taon pag ito ay sinalubong nang may labindalawang klase ng BILOG na prutas sa lamesa.

• MASAMA DAW DUMAAN SA BINTANA KAPAG BATA PA KASI POSIBLE DAW NA PAGLAKI AY MAKIPAGTANAN.

  Nasaway din ako isang beses ng lola ko dahil dito. Magshortcut dapat ako sa bintana pero sinabihan ako na masama daw yun dahil baka makipagtanan daw ako paglaki.

• KAPAG DAW ANG BABAENG BUNTIS AY MAHILIG KUMAIN NG KAMBAL NA SAGING, MAGIGING KAMBAL DIN DAW ANG ANAK.

  Hindi ako naniniwala dito pero noong bata pa ako, nasasaksihan ko na sinasaway ng mga matatanda sa amin ang mga buntis na kumain ng kambal na saging. Kung ayaw daw maging kambal ang anak ay huwag kakain nito.

• MAHABA ANG BUHAY NG TAO NA MAY MALAKING TAINGA.

  Mas mahaba daw ang buhay ng tao kung ang kanyang tainga ay mas malaki sa normal.

• KAPAG DAW HINAKBANGAN NG BABAENG BUNTIS ANG KANYANG ASAWA, MALILIPAT ANG PAGLILIHI SA ASAWA.

  Uso ito sa probinsya namin dati. Pero hindi ko sigurado kung totoo ito. Sa mga babae, kung gusto mo daw na ang asawa mo ang mahirapan sa paglilihi, lakdawan o hakbangan mo daw sya habang natutulog.

• HUWAG DAW MAGPAPAKUHA NG LITRO KUNG TATLO LANG KAYO.

  Naririnig ko itong madalas sa mga kaklase ko noon. Kapag may magpapakuha ng litrato at tatlo lang, kailangan magbawas ng isa o kaya naman ay magdagdag ng isa. Masama daw kapag tatlo lang dahil may masama daw mangyayari sa nasa gitna nung litrato.

Iilan lang po yan sa mga naalala ko na mga pamahiin ng mga matatanda sa lugar namin noon sa probinsya.

Kayo po? Anong pamahiin ang pinaniniwalaan ninyo mag pahanggang sa ngayon? Nagkatotoo po ba sila kaya naging paniniwala nyo na din?

Maraming salamat po ulit sa pagbabasa ng aking maikling artikulo. Sana ay may mga bago kayong nalaman :)