Masaya Ka Ba? (Spoken-word Poetry)

Kamusta ka na?

Matagal na tayong hindi nag-usap ah?

Balita ko, masaya ka na daw sa kanya.

Ako? Heto, iniwan mong durog at nag-iisa.

Gusto ko lang sanang itanong kung

masaya ka ba?

Masaya ka ba?

Masaya ka ba habang bumubuo ka ng mga bago at masasayang alaala na siya,

at hindi na ako, ang iyong kasama?

At ako nama'y tumatawa mag-isa habang inaalala ang mga alaala nating dalawa noong tayo pa ang bida sa istorya,

Sabay pahid sa mga luha na unti-unting pumapatak,

dahil hindi ko namamalayang ako na pala'y umiiyak,

dahil ang mga iyon ay bahagi na lamang ng ating nakaraan,

na kailanman ay hindi na natin pwedeng balikan?

Masaya ka ba?

Masaya ka ba sa tuwing binabati mo siya ng magandang umaga,

at bago kayo matulog ay mayroon ka pa munang sinasabi sa kanya?

Ano nga ba iyon?

Teka. Ah. Naaalala ko na.

"Mahal, mag-iingat ka parati dahil papakasalan pa kita."

Yan din kasi ang lagi mong sinasabi sa akin noon.

Oo. Noon.

Noong ako pa ang bumubuo sa mga araw mo,

Dahil makausap mo lang ako ay nawawala na agad ang pagod mo.

Masaya ka ba?

Masaya ka ba sa tuwing kasama mo siya at sabay pa kayong humahagalpak sa tawa,

dahil sa mga birong una mong sinabi sa akin,

Na bumighani sa aking puso't damdamin?

Samantalang ako, nandito,

Umiiyak sa dulo ng aking kwarto,

habang iniisip ko kung saan ba ako nagkulang,

upang ikaw ay biglang mawala nalang?

Masaya ka ba?

Masaya ka ba sa tuwing binibilhan mo siya ng mga paborito niyang pagkain,

At sabay niyo din itong kakainin,

Na dati mo ding ginagawa sa akin,

noong ikaw pa ay akin?

Masaya ka ba?

Masaya ka ba habang kinakantahan mo siya ng mga bago at sikat na kanta,

Dahil sabi niya, doon lang siya sasaya?

Habang ako nama'y pinauulit ko lamang sa aking memorya ang iyong pagkanta,

dahil doon ko nalang muling maririnig,

ang iyong napakagandang tinig?

Masaya ka ba?

Masaya ka ba sa tuwing tinutugtugan mo siya ng gitara dahil sabi niya,

Ang tipo niyang lalaki ay ung mahilig sa gitara kaya ikaw nama'y agad inaral kung paano nga ba?

Samantalang naaalala ko pa noong pinipilit pa kita na aralin mo ang tumugtog dahil nakakaguwapo ito sa paningin,

At nangako kang ito'y iyong susundin.

Sa akin ka nangako,

pero bakit sa iba mo tinupad ito?

Masaya ka ba?

Masaya ka ba sa tuwing hinahatid-sundo mo siya araw-araw dahil ayaw mong mayroong mangyaring masama sa iyong prinsesa,

Kaya't tudo bantay ka sa kanya?

Ginagawa mo din naman sakin yan dati,

Pero anong nangyari?

Masaya ka ba?

Masaya ka ba sa tuwing tinititigan mo siya at napapasabi ka ng,

"ang swerte ko talaga sa kanya."?

Na parang siya na ang pinakatamang nangyari sa buhay mo,

At nakakalimutan mong minsan ako'y nandito sa kanyang puwesto.

Masaya ka ba?

Masaya ka ba sa tuwing sabay kayong naglalakad,

Na kahit saan man kayo mapadpad,

ay ayos lang basta't siya ang kasama mo?

Na habang magkahawak ang inyong mga kamay,

Sabay kayong nangangarap ng isang napakagandang buhay,

At doon kayo bubuo ng isang masayang pamilya?

Ganun din ang mga usapan natin noon, diba?

Masaya ka ba?

Masaya ka ba sa tuwing kinukulit mo siya,

Na kapag hindi siya nakakapagreply sa mga text mo,

Ay nandiyan na ang isang dosenang tawag mo,

Dahil alam mo na pagbukas niya ng kanyang telepono'y kikiligin siya.

Samantalang noon,

hindi lang ako makapagreply agad, mangungulit ka na.

Mahal, Masaya ka ba?

Dahil kung "OO" ang sagot mo sa tanong ko kung masaya ka ba sa kanya,

Kung masaya ka ba na sa iba mo na ginagawa ang mga bagay na sakin mo ginagawa noong akin ka pa,

Kahit mahirap tanggapin,

Kahit masakit,

Ay pipilitin ko ring maging masaya,

Dahil malaman ko lang na masaya ka,

Kahit hindi na dahil sakin,

Kahit dahil na sa kanya,

Pipilitin kong maging masaya,

para sa inyong dalawa.

~~~~~~~~~~~~~~~~~~~~~~~~~~~~~