Kalayaan!

Ngayong araw ay ika-123 anibersaryo ng ating kasarinlan, kalayaan

Mula sa mananakop na Espanya

Ipinaglaban ng ating mga kanunu-nunuan

Na syang lagi nating ginugunita, taon-taon na lang.

Pero ikaw ba kaibigan,

Malaya ka ba?

O ikaw ay nakakulong sa bakas ng kahapon

Na di mo mabaon sa limot dahil sa sakit na naidulot

Na pag naalala mo ay meron pa ding kurot

Na sa puso ay patuloy na tumutusok.

O baka naman ng pagkakataon o ng relasyon

Gaya ni Anton, di nya maiwan si Sharon

Dahil sila'y minsang nakalimot at nagkaroon ng cute na si Leon

Pero ang mahal nya talaga ay si Veron

Na matagal na nyang karelasyon

At nakatakda na ngang ikasal ngayong June.

O di kaya naman ay bihag tayo ng utang na patong-patong

Aruy, tinamaan naman ako dun!

Na bakit ba naman kasi ang sarap mamili noon

Kain dito, gastos doon

Na di na natin namalayan tayo na pala ay sa utang nabaon

Pero di bale, ito ang sure ko

Lapit na ko makalaya dun.☺️

O baka dahil sa obligasyon

Na dahil sa sobrang mahal mo ang iyong pamilya

Sarili mong kaligayahan ay naisantabi mo na

Pinipilit sabihin ayos lang pero sa loob ay di na pala

Na gustong-gusto mo ng kumawala

Pero nananaig ang iyong awa at pagmamahal sa kanila

Na di ka na umabot sa last trip

Ayan tumatanda ka ng dalaga.

Saan ka pa ba di malaya?

Mula kay crush na di ka nga natignan ni minsan sa mata?

Na ikaw ay dinadaan-daan lang at nakatutok sa daan

Sa mga politikong ang gagaling magsalita na pag nanalo ay nakakulong na sa kanilang mga tahanan

At kahit onting tulong ay di na tayo maambunan!

Sa mga tsismosang kapitbahay kaya?

Na di sila natutuwa pag nakikitang umaangat ka

Imbes na sabihin, deserve mo yan kasi nag-aral ka ng mabuti, masipag ka

Kaso ang tanong pa nila, san sya kumuha ng pera? Luh!

Di naman kaya, nakakulong ka dahil sa salang di mo naman ginawa

Kaso diniin ka kasi malakas ang kapit nila

Na kung magreklamo ka eh itutumba ka nila

Parang yung kapitbahay namin

Napagbintangang binaril nya ang kaibigan nya

Na kahit may witness ay di naman nagsalita

Sa takot na baka sila ang balikan nung mga totoong may pakana

At ang nakakungkot pa

Mga pulis na nag-imbestiga tinatakot sya

At pinipilit baguhin ang statement nya

Subalit mabait talaga ang Panginoon

Dahil sa result ng paraphin test, negative sya

Pero di pa din sya makalaya

Dahil sabi may hearing pa.

Andaming dahilan kung bakit di tayo malaya

O kung iisipin natin ay pwede naman kumawala

Pwede naman maayos at bukas ay okay na, malaya na

Pero sadya yata na minsan tayo ay masokista

Pinapahirapan natin mga sarili natin

Yun bang takot tayo na lumabas mula sa pagkakasadlak

Na ang kulungan naman pala ay walang kandado

Pero ayaw nating tumayo o sadyang napagod lang tayo

Na nag-iipon lang tayo ng sapat na lakas

Para tumayo, lumabas at maglakad

Maglakad palabas

Kung saan may nag-aabang na magandang bukas

Ang paligid ay maaliwalas.

Sana kaibigan, kung pakiramdam mo ikaw ay nakakulong

Sana ay makalaya ka na dyan sa lalonh madaling panahon

Nang tayo ay sabay-sabay ng aahon

At makamtan ang tunay na kalayaan na sa atin ay naaayon.