شعر و شاعری

چاند کو گوشہ ٕ ظلمات میں رکھّا اُس نے

اپنی ہستی کو مری ذات میں رکھّا اُس نے

ہم سے لگ جاٸے کہیں شہر کی رونق پہ نہ داغ

اِس لیے ہم کو مضافات میں رکھّا اُس نے

ایک آسیب زدہ گھر سے چُھڑا کر مجھ کو

اک عجب دشت ِ طلسمات میں رکھّا اُس نے

جو دیا طاق پہ روشن تھا ، اُسے اپنے ساتھ

رات بھر محو مناجات میں رکھّا اُس نے

اُس کا انداز ِ تکلّم تھا نہایت سادہ

بھید کوٸی نہ کسی بات میں رکھّا اُس نے

صبح ِ روشن کے قریں میرے بدن کو رکھ کر

روح کو شام کے اثرات میں رکھّا اُس نے

کچھ قبیلوں میں سدا امن بناٸے رکھّا

کچھ قبیلوں کو فسادات میں رکھّا اُس نے

پھر بھی ہم شکر بجا لاتے رہے ہیں اُس کا

گو ہمیں تلخٸ حالات میں رکھّا اُس نے

وہ سکوں اور کسی صنف ِ سخن میں نہ ملے

جو سکوں دل کے لیے نعت میں رکھّا اُس نے

وہ جو فٹ پاتھ کے قابل بھی نہیں تھے عادل

اُن کو پُر عیش محلّات میں رکھّا اُس نے

عادل حسین