Katuhoan o Dili (Pero Motuo Na Lang Aron Madali)

Daghang mga istorya kaniadto ang mga katigulangan nga usahay katuhoan ug usahay dili. "Motuo na lang aron madali", nag-pasabot nga dili pak-gangon ang nag-istorya, pamation aron mahuman, aron matuhog ang tibuok sugilanon, ug dali nga masabtan sa tanan nga naminaw.

Adunay mga istorya kaniadto nga lisod tuhoan karong panahuna nga naa ta sa gitawag nga "computer age", nga ang tanan pinasikad gyod sa siyantipikong ebidensiya. Pero ang tawo maskin unsang kadako ang kina-adman mutuo sa maong sugilanon kay naa may motindog sa maong istorya, ug dunay pod kini nga ikapakita nga ebidensiya, sumala pa nila.

Kabahin sa sugilanon sa mga tawo, nga isda ang katunga sa lawas, nga gitawag ug serena kung babaye, ug kataw kung lalaki, diin nanimuyo sa ilawom sa dagat. Matod pa sa sugilanon, sila ang hinungdan sa pagkalumos sa usa ka tawo, nga bisan ang maayong mulangoy o atleta dili makasugagod sa kusog sa mga isda ang katunga lawas sa tawo, kung kini mobira na kanila sa kinailad-man sa dagat. Daghan nadungog nga istorya kabahin sa mga serena nga makabibihag ang katahom pero makuratan kang magsud-ong sa ubos nga kabahin sa iyang lawas nga usa ka ikog sa isda.

Katuhoan o dili nga sugilanon:

May usa ka mag-tiayon ka sa kadugay nga panahon wala gyod magka-anak. Ang panginabuhi nila mao ang pagpanguha ug isda o mananagat. Busa nag-puyo sila sa daplin sa dagat. Usa ka adlaw samtang nanagat ang bana o "asawang lalaki" adunay miabay niya nga tawo. Katunga ra ang nakita niya sa tawo kay nag-abay raman kini sa iyang bangka. Gi-ingnan siya, tabangan tika sa imong pag-pangisda nga makakuha ka ug daghan isda ug makabaton ka ug anak, pero ubos sa kondisyon "nga inig abot niya ug 30 ka tuig, ihatag mo siya kanako". Ang mananagat misugot ug misango sa mao nga kondisyon, kay siya pa, dili na manganak iyang asawas kay tigulang na kini.

Sukad niadto nga panghitabo, daghan siya ug kuha kada panagat niya ug miasenso ang iyang panginabuhi, dungan usab sa pag-buros sa iyang asawa. Midako ang bata nga harohay sa kinabuhi kay nakapundar man ang mag-tiayon, nakapalit ug yuta, adunay gamay nga tindahan ug ang ilang kinabuhi simple lang gihapon,mananagat gihapon ang bana. Kada panagat niya, usahay motungha ang tawo ug magpahinumdom sa iyang gisaad kabahin sa bata.

Ug usa ka adlaw sa pagpanagat sa bana mitungha ang tawo ug mi-abay na usab sa iyang banka, naningil na kini sa gisaad sa mananagat kay 30 anyos na ang bata, misango ang mananagat ug mipauli sa ilaha. Sa pag-abot sa ilaha naghipos dayon sila sa ilang mga butang ug milalin sa layong dapit diin layo ang dagat o suba. Gi did-an niya ang bata sa dili pagkaligo o pag-duol sa dagat o suba, gi-dili niya sa pag-adto sa usa ka lugar nga tabukon ug dagat o suba, mag-sakay man sa barko o eroplano, o mutabok ug tulay, basta tabukon ug tubig.

Sa pagbiya nila, ang mga silingan nila kaniadto nga nanimuyo daplin sa dagat mosugilon nga modako ang tubig sa dagat, ang balod mohapak sa lapyahan nga sama adunay bagyo, nga dili man unta ting bagyo, ug makadungog sila ug tingog nga maga-panawag sa ngalan sa mananagat.

Ang bata midako nga normal ug nagtamod sa gidili kaniya sa iyang amahan. Kung tutukan nimu siya ug maayo, tagsa-tagsaon ug tan-aw ang iyang mata, ilong, ang mga tudlo sa mga kamot aduna siya'y similaridad sa usa ka isda, dili pod matawag nga serena, kay ang serena matahom man. Siya dili matawag nga matahom, ug dili usab ngil-ad, kasarangan lamang siya, pero aduna gayoy kala-inan. Sa panahon sa pag-sugilon niini nga panghitabo ang bata wala pa gihapon maminyo ug siya nag-pangidaron na ug 50 anyos kapin niadtong panahona.

Ang akong higala ang nag-sugilon niini ug iya kini nga klasmet sa high school. Kaniadtong panahona, kini nga klasmet mao ra ang naka angkon ug motosiklo nga paga dad-on kung moadto sa eskwelahan, kay harohay ilang panimuyo. Pero wala sukad maka-adto ug layong dapit o maka suroy-suroy basta tabukon ug tubig.

Usa ra ka ordinary nga mananagat ang amahan, peron tungod sa daghang kuha nga mapuno ang iyang bangka, nakapundar siya ug ensakto. Kining tanan tungod sa tawo nga taga dagat ug naningil na sa gisaad sa mananagat.

Ang akong higala dili bugal-bugalon nga pagkatawo, seryoso kini, ug insakto ang pangisip, ang ginikanan niya nagkupot ug taas nga katundanan sa gobyerno ug siya professional nga tawo. Busa makatuo ka, kay pwede niadtong panahona moadto diin siya mitubo ug midako aron pagmatuod sa iyang sugilanon, kay buhi paman niadtong higayona ang anak sa mangingisa.

Sa taas na nga panahon nga nanglabay dili na ako makaingon ug buhi pa ba ang bata, kay ang akong higala mitaliwan naman sa laing kalibutan, siya lamang ang makapamatuod sa tanan.

Usa ka sugilanon nga katuhoan ba o dili, pero mutuo na lang kita aron madali.