Ang Dili Hisabtan Nga Pagbati

Daghang klase sa pagbati, kalipay, kasakit, kalisang, kaguol, kapungot, kasadya ug uban pang klase sa pagbati nga gasumikad sa unsa ang nakita o nasaksihan. Pero adunay pagbati nga dili nimu hisabtan, ilabi na kon ang panghitabo o nadungog apektado ang atong pagkatawo.

Naay panahon nga dili ta kasabot sa atong gibati, dili kita mahimutang, gil-asan, dili makatulog, magsigi ug balibali ang lawas sa paghigda kay wala mahiluna ang hunahuna pero walay gihunahuna. Ang katulugon giilog sa pagbati nga dili masabot ug magbuntag nga walay katulog. Inig pakonsulta sa doktor walay sakit, hatagan lang ug tambal para makatulog ug mahiluna ang hunahuna.

Usahay ang hinungdan sa pagbati nga dili masabot naga sumikad kon unsay naa sa kahiladman tawo. Kon ang kasingkasing sa tawo napuno sa kasuko diin ang pagpasaylo lisod nga ikahatag, dili magmalinawon ang hunahuna sa tawo, kanunay kining maghunahuna sa panghitabo diin nasakitan siya, ngano wala siya makabalos, dayon maghunahuna sa pagpanimalos. Mao nga sa oras sa kagabhion malisod makab-ot ang katulogon.

Apan kon ang tawo napuno sa inspirasyon, malampuson kay nakab-ot niya ang iyang pangandoy nga daw sama sa nakadaog ug lotto, ang iyang pagbati dili masabot, malipay siya, mokatawa, mosiyagit sa kalipay, mohilak ug sa kagabhion dili siya makatulog sa paghunahuna kay dili siya makatuo sa panghitabo nga miabot sa iyang kinabuhi.

Lahi pod ang pagbati kon mawad-an ug minahal sa kinabuhi. Dili usab masabot ang pagabation sa tawo, maguol siya, kaguol nga siya lamang ang mag-antos, dili ika panangpit o ikahatag sa uban ug dili usab mabati sa uban. Ang kaguol dili matugkad ang kalalom ug dili masukod ang gilapdon, sama sa kalangitan nga dili makab-ot pero maklaro ug mabati sa kasing-kasing unsa ang kakusgon ug kabug-aton sa sakit nga gihambin. Pagbati nga daw malunod ug malumos ang kasing kasing sa kaguol, sa pagmahay ug kamingaw. Pagmahay kay wala napakita sa tawo ang iyang kaayo o adunay siya'y mga pagkulang ngadto sa minahal nga wala niya napakita kaniadto ug labaw sa tanan ang pagpangayo ug pasaylo. . Kamingaw, ang pagbati nga dili masabot, gihilap ang kasingkasing susama sa bangkaw nga molagbas sa kasingkasing ug sa kinatibuk-ang lawas , pangandoy nga unta mobalik ug makauban pag-usab ang minahal. Pero mobati usab ug kahadlok ang tawo, gamay nga kasikas, igham, lainon na sa pagsabot, hangtod nga dili na gustong mag-inusara, kon asa paingong pagpauban na.

Kining lainlian nga pagbati nakaumol na sa tawo sa iyang pagkahimugso niing kalibutan. Kon laksion kini nga pagbati dili na siya tawo, kon dili usa na siya ka hayop pero ang hayop may magbati man gani. Maguol usab kini, malipay, masakitan ug mobalos.

Mao kini usa sa katingalahang buhat sa Dios, ang nagkadaiyang pagbati sa tagsa tagasa niyang binuhat.