Takipsilim

Sa pagbungad ng kamalayan

Bukang liwayway sa isipan

Buhay pa'no ba makakamtan

Sa mundong walang katiyakan

Silakbo ng karalitaan

Taghoy ng sidhing kahirapan

Dumurog sa diwa't kalamnan

Tumatak sa puso't isipan

Tinik sa kasakdalang buhay

May layong maging madalisay

Bagkos anino lang dumamay

Ni walang naiwang karamay

Umpukan ng pagkakataon

Sinaboy, lahat itinapon

Hangad ngayo'y di mahagilap

Di alam saang alapaap

O loob ng damdami'y panglaw

Makulimlim kahit may tanglaw

Pilitin may di-abot saklaw

Kasiyahan lang tanging sigaw

Sa tuwing palad nati'y bigo

Di mapigil, luha'y tutulo

Tadhana man ay mapagbiro

Isiping lagi'y 'wag sumuko.