ကမ္ဘာတလွှားက ပန်းရောင် ရေကန် ၅ ခု

ပုံမှန်အားဖြင့်တော့ ရေကန်တွေဟာ အပြာရောင် ၊ အကြည်ရောင် နဲ့ အစိမ်းရောင် စသည်ဖြင့် ရှိတတ်ပေမယ့် ပန်းရောင် ဒါမှမဟုတ် နီစွေးစွေးအရောင်ရှိတဲ့ သဘာဝရေကန်တွေကလည်း ဒီကမ္ဘာပေါ်မှာ ရှားရှားပါးပါး ရှိနေပါသေးတယ်။ ရေကန်တွေ ဒီလို ပန်းရောင်သန်း နေရခြင်းအကြောင်းရင်းကတော့ ဒီရေကန်တွေမှာ Dunaliella salina အမည်ရှိ အလွန်သေးငယ်တဲ့ ပန်းရောင်ရေညှိပါဝင်မှုနှုန်း များပြားနေလို့ဖြစ်ပါတယ်။ ပန်းရောင်ရေကန် Pink Lake လို့ခေါ်တဲ့ ဒီရေကန်တွေဟာ ကမ္ဘာအနှံ့မှာ ရှိနေတတ်ပြီး အများဆုံးတွေ့နိုင်တာကတော့ သြစတြေးလျမှာ ဖြစ်ပါတယ်။ ဒီတခါတော့ ကမ္ဘာတလွှားက ပန်းရောင် ရေကန် ၅ ခု အကြောင်းကို ဝေမျှလိုက်ပါတယ်။

၁။ Laguna Colorada ၊ ဘိုလီးဗီးယား



ဒီရေကန်ကတော့ တောင်အမေရိကတိုက် အင်ဒီးစ်တောင်တန်း altiplano ဒေသမှာ တည်ရှိနေပါတယ်။ ဆားရေကန်တကန်ဖြစ်ပြီး ရေမျက်နှာပြင်အကျယ်အဝန်း ၂၃ စတုရန်းမိုင်တောင် ရှိတဲ့ ရေကန်ကြီးတခုဖြစ်ပါတယ်။ ပင်လယ်ရေမျက်နှာပြင်ထက် အမြင့်ပေ ၁၄၀၀၀ ခန့်မှာ တည်ရှိပြီး ရေကန်ရဲ့ ပျမ်းမျှအနက်ကတော့ ၁ပေ စွန်းစွန်းသာရှိကာ အနက်ဆုံးနေရာမှာတော့ ၅ပေ ခန့်အထိ ရှိနိုင်ပါတယ်။ အင်ဒီးစ်တောင်တန်း နောက်ခံနဲ့အတူ ရှားပါးစာရင်းဝင်နေပြီဖြစ်တဲ့ ဂျိမ်းစ်ကြိုးကြာတွေ James’ flamingos ကို ဒီနေရာမှာ အများဆုံးတွေ့နိုင်ပါတယ်။ ရေကန်ရဲ့ ပတ်ပတ်လည်မှာတော့ ကျေးရွာငယ်လေးတွေ ရှိနေတာကြောင့် လာရောက်လည်ပတ်သူတွေအနေနဲ့ ညအထိ လည်ပတ်နေထိုင်နိုင်ပါတယ်။



၂။ Lake Hillier ၊ သြစတြေးလျ



ပန်းရောင် ရေကန်လို့ ဆိုလိုက်တာနဲ့ ကမ္ဘာပေါ်မှာ လူသိအများဆုံးက သြစတြေးလျမှာ ရှိတဲ့ ဒီ ဟေလီယာ ရေကန်ပဲ ဖြစ်ပါတယ်။ ဒီရေကန်ကို ၁၈၀၂ ခုနှစ်မှာ စတင်တွေ့ရှိခဲ့တာဖြစ်ပြီး သြစတြေးလျနိုင်ငံ တောင်ပိုင်းကမ်းရိုးတန်းအနီးက အလယ်ကျွန်းမှာ တည်ရှိပါတယ်။ အလျား ၂၀၀၀ ပေ နဲ့ အနံ ၈၂၀ပေ ခန့်ရှိပြီး ရေပြင်ဧရိယာ ၃၇ဧက လောက်ရှိတဲ့ ဆားရေကန် တခုဖြစ်ပါတယ်။ ရေကန်ရဲ့ ပတ်ပတ်လည်မှာတော့ သဲသောင်ပြင်ရှိနေပြီး paperbark နဲ့ eucalyptus အစရှိတဲ့ အပင်တွေက ဝန်းရံထားပါတယ်။ ကန်ထဲက ရေတွေက ပန်းရောင်အရင့်ဖြစ်ပြီး ထည့်စရာတခုခုနဲ့ ထည့်လိုက်မယ်ဆိုရင်တောင် ပန်းရောင်သန်းတဲ့ ရေတွေကို ရရှိမှာဖြစ်ပါတယ်။ လည်ပတ်ချင်သူတွေအတွက် ဒီနေရာကို သင်္ဘောတွေ ၊ လေယာဉ်တွေနဲ့ တဆင့်သွားရောက်နိုင်ပြီး ကန်ရဲ့အပေါ်ကနေပျံသန်းပြသတဲ့ ဟယ်ရီကော်ပတာ ဝန်ဆောင်မှုတွေလည်း ရှိနေပါတယ်။



၃။ Hutt Lagoon ၊ သြစတြေးလျ



ဒီရေကန်ကတော့ သြစတြေးလျ အနောက်ပိုင်း Hutt မြစ်ရဲ့ မြောက်ဘက် ၊ အိန္ဒိယသမုဒ္ဒရာနဲ့ဆိုရင် ၁မိုင်ကျော် အကွာအဝေးမှာ တည်ရှိနေတဲ့ ရေကန်တခုဖြစ်ပါတယ်။ ဒီရေကန်ဟာ အလျား ၈.၇မိုင်ခန့် ၊ အနံ ၁.၄မိုင်ခန့် ရှိတဲ့ ရှည်မျောမျော ပုံသဏ္ဍာန်ဖြစ်ပါတယ်။ အနက်ဆုံးနေရာမှာမှ ၂ပေခန့်အထိပဲ ရှိတာကြောင့် လာရောက်လည်ပတ်သူတွေဟာ ရေကန်အနှံ့လမ်းပတ်လျှောက်နိုင်ပါတယ်။ ပုံမှန်ဆိုရင်တော့ ပန်းရောင်ဖြစ်ပေမယ့် ရာသီဥတုကိုလိုက်ကာ အနီရောင် နဲ့ ခရမ်းရောင်တွေ သန်းသွားတတ်တဲ့အခါလည်းရှိပါတယ်။ သွားရောက်ဖူးသူတွေကတော့ ဒီနေရာရဲ့ အလှဆုံးအချိန်ဟာ မနက် ၁၀ နာရီဝန်းကျင် နဲ့ ညနေ နေဝင်ချိန်တွေဖြစ်တယ်လို့ ဆိုကြပါတယ်။



၄။ Las Salinas de Torrevieja ၊ စပိန်



ထူးထူးခြားခြားပဲ ဥရောပတိုက်က စပိန်နိုင်ငံမှာလည်း ပန်းရောင်ရေကန် တကန်ရှိနေပါတယ်။ ရေကန်ရဲ့တည်နေရာကတော့ စပိန်နိုင်ငံ Torrevieja မြို့က Calle Múnera ဆိုတဲ့ နေရာမှာ ဖြစ်ပါတယ်။ ဒီပန်းရောင်ရေကန်ရဲ့ မနီးမဝေးမှာတော့ La Mata လို့ခေါ်တဲ့ အစိမ်းရောင်ရေကန်ကြီး တကန်ရှိနေပြီး ကောင်းကင်ဓာတ်ပုံတွေကနေ ဆိုရင် ဒီအရောင်မတူတဲ့ ရေကန် ၂ ခုကို ယှဉ်တွဲမြင်ရမှာ ဖြစ်ပါတယ်။ ဧက ၃၅၀၀ နီးပါး ကျယ်ဝန်းတဲ့ Las Salinas ရေကန်ဟာ ဥရောပသားတွေ မကြာခဏလာရောက်လေ့ရှိတဲ့ သဘာဝအပန်းဖြေစခန်း တခုလည်းဖြစ်ပါတယ်။ ငှက်တွေသားပေါက်တဲ့ ရာသီကို ရောက်ရင်တော့ ဒီပန်းရောင်ရေပြင်ထဲမှာ ကောင်ရေထောင်ချီတဲ့ ဗျိုင်းတွေကိုသာမက အခြား ရေမှာကျက်စားတဲ့ ငှက်အမျိုးအစား များစွာကိုလည်း မြင်တွေ့နိုင်ပါတယ်။



၅။ Lake Retba ၊ ဆီနီဂေါ



နှင်းဆီကန်လို့လည်း ခေါ်ကြတဲ့ ဒီရေကန်ကတော့ တောင်အာဖရိကတိုက် ဆီနီဂေါနိုင်ငံရဲ့ Cap Vert ကျွန်းဆွယ်မြောက်ပိုင်းမှာ တည်ရှိနေပါတယ်။ ဆီနီဂေါရဲ့မြို့တော် ဒါကာ Dakar နဲ့ ဆိုရင် ၁၈ မိုင်ခန့် အကွာအဝေးမှာ ရှိနေတာဖြစ်ပါတယ်။ ရေကန်ရဲ့ အကျယ်က ၁စတုရန်းမိုင်ခန့်ရှိပြီး အနက်ဆုံးနေရာမှာတော့ ၁၀ပေ နီးပါးခန့် ရှိပါတယ်။ ဒီရေကန်မှာ ဆားပါဝင်မှု အလွန်များတာကြောင့် ပင်လယ်သေလိုပဲ ရေပေါ်မှာ ပေါ်နေနိုင်စွမ်းရှိပါတယ်။ ဒီကန်မှာ ဆားထုတ်လုပ်ရေးလုပ်ငန်းလည်း ရှိနေပြီး ဆီနီဂေါရဲ့ ကမ္ဘာလှည့်ခရီးသွား လာရောက်မှု များပြားတဲ့ နေရာတခုလည်းဖြစ်ပါတယ်။ ခြောက်သွေ့ပြီး မိုးနည်းပါးတဲ့ ရာသီတွေမှာတော့ ပန်းရောင်ဖြစ်နေပေမယ့် မိုးရာသီမှာတော့ ပန်းရောင်ဟာ လျော့နည်းသွားတတ်လေ့ရှိပါတယ်။