@Adbent 21 October 2021 more from that month

Kuha nako nga litrato sa Petronas Twin Towers, Malaysia samtang naglakaw ko padulong sa Philippine Embassy. Unom ka tuig naman diay ko diri ug bag-o lang ko nipirma ug lain na usab nga kontrata. Naaksidenti ko kaniadto sa Saudi hinungdan nga wala nako mobalik didto ug natambay ko ug usa ka tuig tungod sa kaguol ug depresyon nga akong naagian. Gi-kuwestyon nako ang Ginoo ug kon nganong gitugot niya kadto nga mahitabo nako, nga ang ako ra untang pangandoy mao ang makatabang sa akong pamilya. Hangtod nga nakaamgo ko. Nangayo ko'g pasaylo sa Ginoo kay gidudahan nako ang Iyang gugma diri nako. Nangayo ko niyag senyales. Ni-apply ko ug trabaho human sa usa ka tuig. Wala pay usa ka semana dunay nitawag nako nga usa ka agency ug nagpahibalo nga napilian ko sa usa ka employer nga gikan sa Malaysia. Mao na kadto ang mga senyales nga kinahanglan nakong mobangon pag-usab. Malaysia o Singapore ang akong target nga aplayan ug gidungog kini sa Ginoo. Sa akong unom ka tuig nga pagpanarbaho dinhi, akong nasuta kung unsa diay ko ka pinangga sa Ginoo. Naka-plano na diay Niya ang tanan. Dinhi sa Malaysia, akong nakaila-ila ang usa ka binuhat nga nahimo na nako karong asawa ug inahan sa akong anak. Mosalig lang gyod diay ta Niya. *Pasensya na, kataas na ba diay sa akong mga gisugilon. Malipayon lang nakong ipahibalo nga nipirma na pod kog laing kontrata. Hinoon, makamingaw pod ning magsuwat o mag-istorya ug binisaya. #proudbisdak #AkongSugilanon